Archwilio tiriogaeth newidiol ffotograffiaeth ddogfennol y mae A Perfect Sentence: ein hawydd am sylw, cymhlethdod cael ein gweld a’n pryder os cawn ein hanwybyddu. Mae arddangosfa unigol gyntaf Oliver Frank Chanarin yn y Deyrnas Unedig, A Perfect Sentence wedi cael ei chomisiynu a’i chynhyrchu gan Forma gydag wyth o bartneriaid, a bydd yn cynnwys amryfal gyflwyniadau ar draws y wlad, derbyniadau cyhoeddus, platfform digidol a chyhoeddiad.

 

Ymunwch â ni am y premiere yn The Museum of Making, Derby ddydd Iau 16 Mawrth 2023, fel rhan o’r ŵyl ffotograffiaeth eilflwydd FORMAT23.  

 

Gydol 2022, aeth Chanarin ar nifer o siwrneiau ar draws y Deyrnas Unedig, gan gael ei hun ar y cyrion yn aml – o grwpiau ffetisiau swbwrbaidd, i gwmnïau carnifal mewn neuaddau bro, i actifyddion rhywedd yn protestio yn y strydoedd. Daeth ei gamera analog yn offeryn ar gyfer cyfnewid cymdeithasol. Ildiodd sesiynau tynnu lluniau cydweithredol i gyfarfyddiadau siawns â dieithriaid a ffrindiau, camau gwag ac ymgeisiau penderfynol i ymgolli yn y byd. Mae’r ffotograffau hyn felly yn gofnod goddrychol a phersonol o genedl sy’n trawsnewid.

 

Fe wnaeth A Perfect Sentence ddatblygu yn ystod amser rhyfeddol a chythryblus, pan wnaeth Brexit rannu’r wlad, pan orfodwyd pobl i ynysu gan Covid-19 a phan gryfhaodd ymwybyddiaeth y cyhoedd o wleidyddiaeth hunaniaeth. Fe wnaeth y cyplysiad hwn gyd-daro â chwalfa partneriaeth artistig Chanarin – y ddeuawd ryngwladol o fri, Broomberg & Chanarin – y daeth eu cydweithrediad i ben ar ôl bod yn cydweithio am dros ugain mlynedd. Mewn ymateb i’r digwyddiadau hyn, dilynodd Chanarin esiampl portread casgliadol August Sander o gymdeithas yr Almaen, People of the 20th Century (1927-64) a throi at ffotograffiaeth ddogfennol frodorol.

Yn ystod blwyddyn y gwaith cynhyrchu, cymerodd Chanarin dros 2,750 o negatifau lliw analog; a’u hargraffu â llaw yn yr ystafell dywyll er mwyn cynhyrchu cannoedd o brintiau unigryw, math c.  Mae’r gwaith celf terfynol yn cynnwys 300 o ddelweddau, gyda llawer ohonynt yn debyg i ffotograffau ar ganol eu datblygu. Mae arbrofion â datguddio, cwtogi a hidlo lliwiau i’w gweld drwy nodiannau rhedol yr artist. Mae’r llythyrau a’r rhifau sy’n anodi’r arwynebau yn tynnu sylw’r gwyliwr at oddrychedd cynhenid y broses o greu delweddau.

 

Bydd detholiad o ffotograffau o A Perfect Sentence yn cael eu harddangos am y tro cyntaf yn The Museum of Making, Derby ar 16 Mawrth – 3 Medi 2023, fel rhan o FORMAT23, sef gŵyl ffotograffiaeth ryngwladol arweiniol y Deyrnas Unedig. Mae testunau artist Chanarin sydd wedi’u hysgogi gan naratif yn cyd-fynd â’r arddangosiad ffotograffig – rhyddiaith farddonol sy’n uno atgof, ffaith a ffuglen. Fel rhan o’r gwaith A Perfect Sentence caiff platfform digidol ei lansio, a chaiff y llyfr A Perfect Sentence hefyd ei gyhoeddi ym mis Mehefin 2023 gan Loose Joints.

 

Cynhelir rhaglen o arddangosiadau a chyflwyniadau ar draws y Deyrnas Unedig dros y ddwy flynedd nesaf. Caiff y manylion eu cyhoeddi’n ddiweddarach yn 2023.