O’r Lladin am ‘gelfyddydau’r byd’ i adlewyrchu’n ffocws ar wirioneddau cymdeithasol, cenhadaeth Artes Mundi yw dod â chelfyddyd ryngwladol eithriadol i Gymru a chreu cyfleoedd unigryw i unigolion a chymunedau lleol ymgysylltu’n greadigol â phynciau llosg ein hoes mewn ffyrdd sy’n taro tant gyda phob un ohonom. Rydym wedi ymrwymo i ysgogi deialogau a dadleuon, yn rhyngwladol ac yn lleol, sy’n datblygu gwell dealltwriaeth o’n hunain, o eraill, ac o’r berthynas rhwng diwylliannau cyfarwydd a phellennig.

Sefydlwyd Artes Mundi yn 2002 fel menter gan yr artist a’r entrepreneur diwylliannol, William Wilkins CBE, gyda chefnogaeth Llywodraeth Cynulliad Cymru, Dinas Caerdydd, Cyngor Celfyddydau Cymru a BBC Cymru. Rydym yn fwyaf adnabyddus am ein Harddangosfa a’n Gwobr ryngwladol sy’n cael eu cynnal yng Nghaerdydd bob dwy flynedd, a dyma un o sioeau celf gweledol cyfoes mwyaf a mwyaf cyffrous Cymru. Fel arfer, mae nifer yr artistiaid a ddewisir i’w harddangos yn amrywio bob tro, a dyfernir y wobr o £40,000, sef y wobr gelf fwyaf ym Mhrydain ac un o wobrau mwyaf arwyddocaol y byd, i un o’r artistiaid ar y rhestr fer.

Mae Artes Mundi Prize Ltd yn elusen gofrestredig. Fe’i rheolir gan Fwrdd Ymddiriedolwyr sy’n cynnwys unigolion uchel eu parch o fyd busnes, y gymuned celfyddydau gweledol a’r sector diwylliannol a phroffesiynol ehangach. Mae pob aelod o’r Bwrdd yn gwasanaethu, ynghyd â gwirfoddolwyr eraill, ar un neu fwy o bwyllgorau bwrdd sy’n mynd i’r afael â rolau penodol, i gefnogi gwaith Artes Mundi ar lefel gynllunio a lefel weithredol.

Mae Artes Mundi Prize Ltd yn elusen nid-er-elw gofrestredig sy’n dibynnu’n flynyddol ar gymorth gan unigolion, corfforaethau, noddwyr, ymddiriedolaethau a sefydliadau i ariannu costau ein holl raglenni, ochr yn ochr â’n refeniw cyhoeddus craidd gan Gyngor Celfyddydau Cymru a Chyngor Dinas Caerdydd. Mae’r buddsoddiad hael hwn gan y sector cyhoeddus yn ei dro yn darparu’r potensial am ddylanwad pwysig er mwyn denu ystod amrywiol o ffynonellau preifat, gydag Artes Mundi yn codi’n agos at dair gwaith y lefel graidd hon o gefnogaeth bob blwyddyn yn gyson.

Cefnogir Artes Mundi yn hael gan Gyngor Celfyddydau Cymru a Chyngor Dinas Caerdydd ac mae’n diolch yn ddiffuant i’n holl gefnogwyr a’n partneriaid hirsefydlog.

Rydym hefyd yn mynegi ein diolch o galon i’n llu o gefnogwyr cyhoeddus a phreifat, gan gynnwys Ymddiriedolaethau, Sefydliadau, Asiantaethau Diwylliannol, cyfranwyr, noddwyr a gwirfoddolwyr sy’n darparu cyllid hanfodol tuag at ein rhaglenni.

Artes Mundi Prize Ltd masnachu fel Artes Mundi. Wedi’i gofrestru yn y DU, rhif cwmni 1097377, rhif elusen 04239932. Cyfeiriad swyddfa gofrestredig, Ystafell S01: 13, Amgueddfa Genedlaethol Cymru, Parc Cathays, Caerdydd CF10 3NP.