Mae Williams yn defnyddio amlgyfryngau, perfformiadau a thestun i archwilio’r gwrthdaro rhwng yr agweddau ‘hynod ddifrifol’ a ‘chwbl gyffredin’ sy’n perthyn i fywyd modern. Mae Williams yn enwog am ddychanu’r berthynas rhwng yr artist a’r curadur trwy greu senarios absẃrd y gallant ymddangos ynddynt. Gan ddatblygu ar sail hyn, mewn blynyddoedd diweddar mae Williams wedi ymddiddori mwyfwy mewn fideo ar ôl degawd o weithio gyda pherfformiadau’r gair llafar.

Cafodd cyfres o 14 llun pin ac inc, ynghyd â dau waith fideo newydd – sef Tyrrau Mawr a Writ Stink (2015) – eu prynu ar gyfer casgliad Amgueddfa Cymru. Mae’r gweithiau ffilm newydd hyn yn cynnwys cyfryngau cymysg, a defnyddir hiwmor a bathos i drin a thrafod materion, pynciau a themâu’n ymwneud â dystopia a phwysigrwydd dynol-ryw yn y bydysawd.