Mae ei gweithiau cignoeth a mynegiadol yn cyfuno’r arfer o baentio, gwneud lluniau, ysgrifennu, collage a gwneud cerfluniau er mwyn ystyried y gorffennol a’r presennol trwy ryngblethu economeg, athroniaeth, llenyddiaeth a mythau. Ers y 1970au, mae Boghiguian wedi teithio’n ddi-dor ac mae ei gwaith wedi cofnodi ei hargraffiadau a’i harsylwadau o amryfal gymdeithasau, yn ogystal â’i phrofiadau o beidio â pherthyn fel estron a dieithryn. Yng ngwaith Boghiguian, mae palimpsest y cof yn cymryd gwedd ffisegol ar ffurf haen arw sy’n tewychu wyneb ei phaentiadau gyda llosgliw, pigment, dur, collage a malurion amhenodol.

Yn nodweddiadol o’i lluniau, ei phaentiadau, ei lluniau torri a’i gosodweithiau cynnil a gwleidyddol sy’n archwilio systemau byd-eang ac arbedion pŵer cymhleth, mae A Meteor Fell From The Sky yn osodwaith anferth a grëwyd yn benodol ar gyfer Artes Mundi 8. Mae wedi’i wreiddio yn hanes lleol Cymru a chyd-destun y diwydiant dur. Mae’n mynd y tu hwnt i economeg fyd-eang amhersonol ac yn treiddio i’r cymunedau y mae eu bywydau’n ei gwmpasu, yn cynnwys Port Talbot, Cymru.