Mae Harsha yn creu paentiadau, gosodweithiau mawr a phrosiectau cymunedol. Gan weithio yn aml yng nghyd-destun traddodiadau naratif paentiadau bychain India, mae gwaith Harsha yn datgelu sylwadaeth wleidyddol lle mae ffigyrau yn ei fyd cywrain, cyfrwys a chwareus bron yn ddieithriad yn canolbwyntio ar ddigwyddiad, ac mae’r ffigurau hynny wedi’u hanimeiddio gan chwilfrydedd y naill i’r llall, wrth iddynt dynnu sylw at rywbeth sy’n hynod, yn anghydweddol neu’n rhyfedd mewn ffordd ddigri. I’r gwyliwr, yng ngraddfa’r darluniadau ac ym manylder trawiadol cryno iawn y portreadau bychain y mae’r ffraethineb.

Yn ei waith diweddar, Cosmic Orphans (2006), sef gosodiad penodol ar gyfer safle teml Sri Krishnan a grëwyd ar gyfer Biennale Singapore, gorchuddiodd Harsha y nenfwd cyfan uwchben y sanctwm mewnol a’r llawr o amgylch tŵr y deml gyda phaentiadau o ffigyrau’n cysgu. Wedi eu paentio’n syth ar y llawr gan ddefnyddio lliwiau fflat, mae’r ffigyrau’n ymddangos mewn llefydd na chânt eu cysylltu â phaentio traddodiadol – eu dadleoliad yn annog y gynulleidfa i ystyried beth a ganiateir ac a waherddir o ran ble y cânt sefyll yn y deml.