Mae gwaith Theaster Gates yn cynnwys cerfluniau, gosodweithiau, perfformiadau ac ymyriadau trefol sy’n anelu at bontio’r bwlch rhwng celfyddyd a bywyd. Mae’n gweithio fel artist, curadur, cynllunydd trefol a hwylusydd, a nod ei brosiectau yw ysgogi’r arfer o greu cymunedau diwylliannol trwy weithredu fel sbardun ar gyfer ymgysylltu cymunedol a all arwain at newid gwleidyddol a gofodol. Mae Gates wedi disgrifio’i ddull gweithio fel “beirniadu trwy gydweithredu” – yn aml gyda phenseiri, ymchwilwyr a pherfformwyr – er mwyn creu gweithiau sy’n ymestyn y syniad o’r hyn a ystyriwn, fel arfer, yn arferion gweledol.

Yn Amgueddfa Gelf Milwaukee yn 2010, fe wnaeth Gates wahodd côr gospel i’r orielau i ganu caneuon a oedd wedi’u haddasu o arysgrifau ar botiau gan y caethwas a’r crochenydd enwog o’r 19eg ganrif, ‘Dave Drake’. Ar gyfer Arddangosfa Eilflwydd Whitney yn 2010, gweddnewidiodd y Cwrt Cerfluniau gyda gosodwaith pensaernïol a gynigiai fan ymgynnull ar gyfer perfformwyr, ymgysylltu cymdeithasol a myfyrio; ac yn The Listening Room yn Amgueddfa Gelf Seattle, trowyd yr oriel yn archif sain a oedd yn cynnwys caban DJ, ynghyd â DJ a chwaraeai ganeuon o’r siop recordiau Dr Wax yn Chicago, sydd wedi cau bellach – lle a arferai fod yn ganolfan ddylanwadol ar gyfer cerddoriaeth y 60au, y 70au a’r 80au, yn enwedig jas, y blws ac R&B.