Cafodd Sawangwongse Yawnghwe (g. 1971) ei eni i’r teulu brenhinol Yawnghwe. Ei dad-cu, Sao Shwe Thaik, oedd arlywydd cyntaf Undeb Burma (1948–1962) ar ôl iddynt ennill annibyniaeth oddi wrth Brydain. Yn dilyn chwyldro milwrol 1962 alltudiwyd teulu Yawnghwe, yn gyntaf i Wlad Thai ac yna i Ganada, lle cafodd ei fagu. Mae bellach yn byw a gweithio yn yr Iseldiroedd. Mae celf Yawnghwe, gan gynnwys peintio a gosodiadau, yn ymgysylltu â gwleidyddiaeth trwy hanes ei deulu a digwyddiadau cyfoes a hanesyddol yn Burma. Mae’n defnyddio ffotograffau teuluol i archwilio a beirniadu naratif ei wlad, gan awgrymu na all archifau presennol gyfleu gwirionedd cenedl yn llawn. Mae ei waith hefyd yn cynnwys mapiau sy’n mynd i’r afael â gwrthdaro sy’n gysylltiedig â chyffuriau, byddinoedd chwyldroadol, lleiafrifoedd ethnig, mwyngloddio, a thrais y wladwriaeth, gyda’r nod o egluro tirwedd wleidyddol gymhleth.