Arddangosfa Artes Mundi 9

Mae Angels of Testimony yn waith fideo tair sgrin. Mae monitor yn dangos Hajime Kondo, cyn-filwr 99 oed o Ail Ryfel Sino-Japan (1937-45), un o’r ychydig gyn-filwyr yn Japan i ddatgan yn gyhoeddus wybodaeth a phrofiad o erchyllterau’r rhyfel a welodd ac a oedd yn rhan ohonynt. Wedi’i gyfweld gan yr artist i ddwyn i gof yr adegau hyn, gwelwn Kondo yn cael trafferth cofio, wedi’i lethu gan euogrwydd ac yn parhau i geisio gwaredigaeth. Fe’n denir gan ing yr hen ŵr, sy’n amlwg yn ei holl eiddilwch ac yn ei gyffesu dewr, ac fe’n brawychir ar yr un pryd gan arswyd y gweithredoedd y bu’n dyst iddynt Ochr yn ochr â hyn mae dau dafluniad o berfformiadau a ddatblygwyd gan bobl ifanc yn eu harddegau drwy weithdai gyda Koizumi, sy’n cynnwys tystiolaethau dethol gan Mr. Kondo, gyda’r bobl ifanc yn cydnabod ei ddatganiadau fel eiliad o berchnogaeth gyhoeddus, gwrthdaro ac adferiad. Mae’r tri fideo, pob un o wahanol hyd, yn cydblethu, yn newid yn barhaus, fel pe baent yn chwilio am ffordd newydd o gynrychioli hanes, yn enwedig y rheini sy’n aml yn rhy gywilyddus i fod yn rhan o ymwybyddiaeth bersonol a chyfunol.

Efallai y bydd testun y gosodiad fideo yn peri pryder i rai gwylwyr gan ei fod yn cynnwys disgrifiadau llafar o erchyllterau rhyfel.