Arddangosfa Artes Mundi 9

Er ei bod yn fwyaf adnabyddus am weithio gyda ffotograffiaeth, yn Amgueddfa Genedlaethol Caerdydd, cyflwynir gosodiad cymhleth sy’n defnyddio delweddau sy’n tynnu o’r ddogfen i greu lluniau wedi’u llwyfannu sy’n llunio naratifau. Mae Repeating the Obvious yn ailadrodd ar wahanol feintiau ddarlun ethereal o berson ifanc dan gwfl, gan beri i’r gwylwyr ymdrochi yn y môr o ddelweddau. Mae detholiad o ffotograffau o’r gyfres Constructing History yn ail-greu eiliadau eiconig o’r 1960au a gynhyrchwyd yn amlwg mewn amgylchedd stiwdio. Mae’r eiliadau a ddewiswyd yn ymwneud â thrais a chwyldro cymdeithasol ac yn dangos aflonyddwch ar lwybr hanes a meddwl yr 20fed Ganrif. Gyda phobl ifanc yn actio adegau nodweddiadol enwog o fraddlofruddio, tystio a galaru, mae ystyr dwfn yn datblygu yn y theatrigrwydd sydd wedi’i lwyfannu.

Ochr yn ochr â’r gweithiau presennol hwn a ddewiswyd, mae gwaith aml-ddelwedd newydd, The Push, The Call, The Scream, The Dream, a ddatblygwyd fel ymateb i farwolaeth ddiweddar y gwleidydd Americanaidd a’r arweinydd hawliau sifil, John Lewis yn 2020, a’r newidiadau a’r sefyllfa gymdeithasol a gwleidyddol ehangach ym mhedwar ban byd. Defnyddia Weems y ddelwedd a grëir fel cyfrwng ar gyfer cwestiynu syniadau a dderbyniwyd ac fel modd o gynrychioli delweddau o’r cymunedau hynny, yn enwedig Pobl Dduon a menywod, a eithrir yn aml o gynrychiolaeth brif ffrwd. Yn Chapter, mae cyfres o hysbysfyrddau a phosteri ar raddfa fawr o’i hymgyrch gelfyddyd gyhoeddus ddiweddar a pharhaus, RESIST COVID TAKE 6! sy’n canolbwyntio ar y pandemig byd-eang sy’n parhau i effeithio ar bob un ohonom, ac yn arbennig ei effaith ar bobl groenliw. Yma mae delwedd a thestun yn cyfuno i gyfleu dyfodol mwy gobeithiol.