Cyflwynodd John Akomfrah ei diptych Auto da Fé (2016) lle defnyddir estheteg drama gyfnod i ystyried yr achosion hanesyddol a chyfoes sydd wrth wraidd ymfudo, gan ganolbwyntio ar erledigaeth grefyddol fel un o brif achosion dadleoli byd-eang. Mae Under-Writing Beirut gan Lamia Joreige yn archwilio hanes cymhleth gwrthdaro yn Libanus a sut mae gorffennol a phresennol Beirut yn dal i effeithio ar y ddinas a’i thrigolion. Teithiodd Amy Franceschini i Gaerdydd o Oslo mewn cwch, gan olrhain taith ymfudol hadau, er mwyn ystyried gwleidyddiaeth cynhyrchu bwyd a’r gwledydd hynny y mae ein bwyd yn tarddu ohonynt. Cyflwynodd Neïl Beloufa gyfres o ffilmiau gan gynnwys Monopoly (2016) lle mae criw o bobl ifanc o’r Wcráin yn chwarae Monopoly. Mae’r elfen chwareus yn cuddio natur ddifrifol y materion dan sylw, gan gnoi cil ar wleidyddiaeth a strwythurau grym.

Mae Akomfrah, a aned yn Ghana, yn ffigwr arloesol mewn Sinema Brydeinig Ddu ac yn rhagflaenydd mewn sinematograffi digidol. Ers 30 mlynedd mae’r artist, yr awdur a’r damcaniaethwr wedi bod yn tynnu sylw at alltudiaeth Affricaniaid yn Ewrop trwy greu ffilmiau sy’n archwilio hanes ymylol cymdeithas Ewrop. Caiff ei weithiau eu hystyried ymhlith y rhai mwyaf nodedig ac arloesol yn y Brydain gyfoes.