Mae Ikon (Birmingham) yn cyflwyno The Sky in a Room, prosiect mawr oddi ar y safle gyda’r artist o Wlad yr Iâ, Ragnar Kjartansson, wedi’i drefnu mewn cydweithrediad ag Artes Mundi.

 

Mae The Sky in a Room yn cynnwys cantorion proffesiynol yn cymryd tro i berfformio trefniant etheraidd o Il Cielo in una Stanza, y gân enwog gan Gino Paoli a ryddhawyd yn wreiddiol ym 1960. Gan chwarae’r organ eglwysig ar yr un pryd, mae’r cantorion yn ailadrodd y darn yn ddi-dor am bum awr bob dydd am naw diwrnod, fel hwiangerdd ddiddiwedd.

 

Bydd y perfformiadau’n digwydd bob dydd rhwng 2 a 7yh yn Eglwys y Santes Fair Fadlen, Tanworth-in-Arden, yng nghanol cefn gwlad Swydd Warwick. Mae’r lleoliad yn rhyfeddol o addas i waith Kjartansson – a nodweddir gan ryw deimlad o brudd-der – gan mai dyma hefyd y man lle claddwyd y canwr-gyfansoddwr Nick Drake.

 

Mae The Sky in a Room wedi’i greu gan yr artist Ragnar Kjartansson y mae ei waith artistig yn defnyddio amlgyfryngau, gan gynnwys gosodweithiau fideo, perfformiadau, arluniau a phaentiadau sy’n tynnu ar fyrdd o gyfeiriadau hanesyddol a diwylliannol. Mae rhyw dristwch ac eironi sylfaenol yn cysylltu’i weithiau, gyda phob un yn cael ei ddylanwadu arno gan gomedi a thrasiedi’r theatr glasurol. Mae’r artist yn pylu’r gwahaniaethau rhwng cyfryngau gan ymdrin â’i ddulliau paentio fel perfformiadau ac yn cyffelybu’i ffilmiau i baentiadau a’i berfformiadau i gerfluniau. Ar hyd yr amser mae Kjartansson yn cyfleu diddordeb mewn harddwch a’i gyffredinedd ac mae’n defnyddio perfformio ailadroddus sy’n para dros amser fel ffordd o ymchwilio iddynt.

 

Cafodd y prosiect a gydgomisiynwyd yn wreiddiol gan Artes Mundi, Caerdydd ac Amgueddfa Cymru, a’i chefnogi gan Gronfa Ymddiriedolaeth a Chelf Derek Williams, ei berfformio’n gyntaf yn 2018. Fel rhan o’r gwaith, symudwyd yr holl baentiadau, gwrthrychau a dodrefn addurnol o oriel Celf ym Mhrydain 1700-1800, gan adael dim ond yr organ siambr o’r 18fed ganrif yng nghanol yr ystafell (mae cofnod o’r perfformiad ar gael yma). Yn 2020 cynhaliwyd The Sky in a Room yn eglwys San Carlo al Lazzaretto ym Milan – cafwyd y syniad yn sgil cyfnod clo Covid-19 a effeithiodd ar filiynau o Eidalwyr, yn arbennig dinasyddion Lombardi.

 

Bellach mae Ikon yn cyflwyno The Sky in a Room yn Eglwys y Santes Fair Fadlen, sy’n nodweddiadol Seisnig ei naws ac yn adeilad rhestredig Graddfa 1 o’r 14eg ganrif. Wedi’i lleoli ar ganol cymuned y pentref, mae’r eglwys hefyd yn enwog fel lleoliad bedd Nick Drake ac yn ganolbwynt i bererindod blynyddol i’w ddilynwyr, nid lleiaf yn 2022 sy’n dynodi 50 mlwyddiant yr albwm Pink Moon. Bydd Eglwys y Santes Fair Fadlen hefyd newydd gwblhau prosiect ailddatblygu er mwyn creu gofod croesawus a hygyrch i’r gymuned. The Sky in a Room sy’n lansio’r eglwys ar ei newydd wedd.

 

Mae’r perfformwyr ar gyfer cyflwyniad Ikon wedi’u recriwtio ar y cyd ag Echo, ensemble lleisiol sy’n cynnwys cantorion proffesiynol ifainc o bob cwr o’r DU. Bydd pob un yn cymryd ei dro mewn perfformiad parhaus o Il Cielo in una Stanza.

 

Gwybodaeth am y digwyddiad:

Perfformiadau dyddiol, 25 Mehefin – 3 Gorffennaf, 2yp – 7yh. Dim angen archebu lle, dim ond galw heibio. Mae croeso i gyfraniadau – cefnogwch ailddatblygu Eglwys y Santes Fair Fadlen. Diolch.

 

Sut i gyrraedd Tanworth-in-Arden:

Lleolir Tanworth-in-Arden 14.5 o filltiroedd i’r de-ddwyrain o Birmingham a 5.5 milltir i’r gogledd-ddwyrain o Redditch. Cod post Eglwys y Santes Fair Fadlen yw: B94 5AL.  Yr orsaf drenau agosaf yw Danzey Green (1.2 milltir o Tanworth).