Gan ddefnyddio ei brofiadau personol o ddadleoli, gwrthdaro a thrawma a ddioddefodd dan gyfundrefnau trefedigaethol ac ideolegol Irac, mae celf Anwar yn cyfeirnodi ac yn ysgogi trafodaeth ynglŷn â statws tegwch cymdeithasol – gan archwilio ei gymhlethdod gwleidyddol, cymdeithasol a chrefyddol drwy astudiaeth o ffurf a’i materoliaeth. Gan ddefnyddio gosodiadau, cerfluniau, paentiadau, ffotograffiaeth a fideo, mae ei ymarfer yn dwyn i gof argyfwng beunyddiol y miloedd o bobl wedi’u dadleoli sydd ar hyn o bryd yn dioddef gwahaniaethu ac erledigaeth, tra’n cwestiynu’r posibilrwydd o waredigaeth ac yn dadlau bod angen i bawb ddangos empathi fel rheidrwydd cymdeithasol.  

Cafodd Anwar ei PhD o Brifysgol RMIT, Melbourne, ac ar hyn o bryd mae’n Uwch Ddarlithydd yn yr adran baentio ym Mhrifysgol Chiang Mai, Gwlad Thai. Mae wedi cael arddangosfeydd unigol a grŵp yn Awstralia, Awstria, Bwlgaria, Canada, Tsieina, Ciwba, y Ffindir, Ffrainc, Japan, Cwrdistan, Norwy, De Corea, y Swistir, Gwlad Thai, yr Emiradau Arabaidd Unedig, y Deyrnas Unedig, yr Unol Daleithiau a Fietnam. Mae ei brif arddangosfeydd yn ddiweddar yn cynnwys “Sharjah Biennial 15: Thinking Historically in the Present”, Sharjah (2023); “Art in Conflict”, arddangosfa deithiol Cofeb Ryfel Awstralia, lleoliadau amrywiol, Awstralia (2022–24); “wHole”, Amgueddfa Celf Fodern Heide, Melbourne (2022); “Now”, Oriel Esta yn Y Ffatri Ddiwylliant, Sulaymaniyah (2022); “The Tides of the Century”, Amgueddfa Ynys Ocean Flower, Danzhou (2021); ac “Escape Routes: Bangkok Art Biennale”, Bangkok (2020).  

Ar hyn o bryd mae Anwar yn byw rhwng Chiang Mai, Gwlad Thai, a Melbourne, Awstralia.