Gellir dod o hyd i ragor o wybodaeth am bob artist, cynnwys eu harddangosfa a delweddau o weithiau sy’n cael eu harddangos trwy glicio ar y delweddau portread artist isod.

Bydd arddangosfa Artes Mundi 9 yn arddangos gwaith gan chwe artist cyfoes rhyngwladol blaenllaw mewn tri lleoliad: Amgueddfa Genedlaethol Caerdydd, Chapter a g39. Dewiswyd y rhestr fer gan feirniaid arbenigol o blith mwy na 700 o enwebiadau o 90 o wledydd ac mae enillwyr diweddar yn cynnwys: Theaster Gates (2015), John Akomfrah (2017) ac Apichatpong Weerasethakul (2019).

Er i’r rhestr fer gael ei chadarnhau gyntaf ym mis Medi 2019 – ar adeg pryd na allai fawr neb ddarogan beth roedd y byd yn rhuthro tuag ato – nid yw’n gyd-ddigwyddiad bod yr artistiaid i gyd yn ystyried, ymdrin â ac yn cwestiynu rhai o’r materion mwyaf tyngedfennol yr ydym yn eu hwynebu ar hyn o bryd. Mae cyflwyniadau o waith newydd a diweddar yn canolbwyntio ar effaith difaol hanesion trefedigaethu, newid amgylcheddol, trawma ac iacháu rhwng cenedlaethau, adladd a chynhysgaeth gwrthdaro a phryderon parhaus ynglŷn â chynrychiolaeth a braint.

Mae’r artist Firelei Báez a aned yn y Weriniaeth Ddominicaidd ac sy’n byw yn Efrog Newydd yn edrych ar naratifau alltudiaeth, yn dathlu goddrychedd du benywaidd ac yn dychmygu posibiliadau newydd i’r dyfodol drwy baentiadau deinamig, hynod a manwl. Drwy osodwaith ymdrwythol newydd, mae’r artist o Dde Affrica Dineo Seshee Bopape yn ymgysylltu’n faterol ac yn gysyniadol â lle, hanes a chanlyniadau’r fasnach gaethwasiaeth ar draws yr Iwerydd drwy wrthrychau, defod a chân gan gyflwyno celfyddyd fel rhywbeth sy’n ymgorffori’r potensial ar gyfer cydnabod a chyfamodi.

Mae triptych fideo teimladwy’r artist o Japan Meiro Koizumi Angels of Testimony yn mynd i’r afael â chynhysgaeth yr Ail Ryfel rhwng Tsieina a Japan (1937-1945), gan ddatgymalu tabŵs diwylliannol a chychwyn y broses iacháu drwy gydnabod hanesion cywilyddus. Mae pum ffilm a fideo’r artist o Puerto Rico, Beatriz Santiago Muñoz yn cydblethu’n farddonol i greu gosodwaith haenog o naratifau aflinol sy’n ystyried hanesion ac effaith presenoldeb parhaus gwahanol drefedigaethwyr ar Puerto Rico, ei thirwedd, ei phobl a’i diwylliant.

Mae Prabhakar Pachpute— y bu ei deulu’n gweithio ym mhyllau glo canol India am dair cenhedlaeth – yn tynnu ar dreftadaeth ddiwylliannol a rennir â’r gymuned lofaol yng Nghymru i greu gosodwaith sy’n cynnwys paentiadau, baneri a gwrthrychau sy’n harneisio eiconograffeg protest a gweithredu torfol. Mae gwaith gan yr artist Americanaidd Carrie Mae Weems, sy’n enwog am ei hymgysylltu pwerus â chynrychiolaeth ddu a benywaidd, yn cwmpasu hunaniaeth ddiwylliannol, hiliaeth, dosbarth, systemau gwleidyddol a chanlyniadau grym. Mae gosodwaith ffotograffig newydd yn ystyried y diweddar actifydd hawliau sifil John Robert Lewis yng nghyd-destun y presennol, gyda detholiad o ddarnau mawr o’i hymgyrch celfyddyd gyhoeddus diweddar yn ymchwilio i effaith anghymesur y pandemig ar gymunedau lliw wrth gynnig negeseuon o obaith.

Yn ôl Nigel Prince, Cyfarwyddwr Artes Mundi: Llwyfan yw Artes Mundi ar gyfer gwahanol bersbectifau a lleisiau sy’n ceisio ysgogi deialog ystyrlon. Hyfrydwch pur i ni yw cyhoeddi dyddiadau diwygiedig Artes Mundi 9 ac rydyn ni’n ymrwymedig i gyflwyno rhaglen sy’n ddiogel i’r holl artistiaid, cynulleidfaoedd, partneriaid a chefnogwyr. Wrth i ni fyw drwy ac ymgysylltu â newidiadau byd eang pellgyrhaeddol, yn fwy nag erioed, mae gwaith pob un o’r chwe artist yn ymdrin ac yn taro deuddeg â’r syniadau a materion y mae’n rhaid i ni fynd i’r afael â nhw fel unigolion ac yn dorfol yn ein cymdeithasau sy’n ymwneud â thegwch, cynrychiolaeth, trawma a braint.

Detholwyd y rhestr fer gan reithgor oedd yn cynnwys Cosmin Costinas, Cyfarwyddwr Gweithredol a Churadur Para Site, Hong Kong a Chyfarwyddwr Artistig Triennale Kathmandu 2020; Elvira Dyangani Ose, Cyfarwyddwr Oriel y Showroom yn Llundain; a Rachel Kent, Prif Guradur Amgueddfa Celfyddyd Gyfoes, Sydney, Awstralia.

Yn ôl y rheithgor: Gan gwmpasu paentio ac arlunio, gwneud gwrthrychau, ffilm a fideo, mae gwaith yr artistiaid yn eistedd o fewn cyddestun yr amgueddfa a thu hwnt; mae rhai’n trawsnewid gofodau cyhoeddus ac eraill yn bodoli fel iteriadau byrhoedlog. Gan weithio yn erbyn y syniad o ganolbwynt, maent yn adlewyrchu gwahanol naratifau byd-eang mewn ffyrdd cyffrous yn ogystal â meddylgar. Mae gweithiau’r artistiaid hyn yn ymdrin mewn ffordd bwerus â’r grymoedd newidiol sy’n siapio ein byd, gan gwmpasu themâu o hunaniaeth ac adrodd, strwythurau cymdeithasol a’r cof torfol, a diwydiant a’r argyfwng ecolegol.

Caiff y rhaglen sgyrsiau ei chynnal ar Zoom a’i chyflwyno mewn partneriaeth â Phrifysgol Metropolitan Caerdydd. Bydd sgyrsiau Wrth y bwrdd AM DDIM i bawb gyda’r gyntaf yn cael ei lansio ddydd Iau 11 Mawrth am 8pm GMT. Bydd pob un o’r artistiaid ar y rhestr fer yn sgwrsio ag arbenigwyr o bob cwr o’r byd. Mae’r digwyddiadau byw hyn bellach ar gael i wrando arnynt fel podlediadau, cliciwch yma.

Dydd Iau 11 Mawrth, 8pm GMT: FIRELEI BÁEZ

Mwy o wybodaeth

Yr artist rhestr fer AM9 Firelei Báez yn sgwrsio gyda Dr Francesca Sobande, darlithydd mewn Astudiaethau Cyfryngau Digidol ym Mhrifysgol Caerdydd gan ganolbwyntio’n arbennig ar ddiwylliant digidol, hunaniaeth Ddu a’r diaspora, ffeministiaeth, a diwylliant poblogaidd; a’r artist a’r ymchwilydd o Gaerdydd sy’n hanu o Trinidad yn wreiddiol, Dr Adéọlá Dewis. Bydd y sgwrs yn cael ei chadeirio gan un o feirniaid Artes Mundi 9 Rachel Kent, Prif Guradur Amgueddfa Celfyddyd Gyfoes Awstralia.

Dydd Iau 8 Ebrill, 7pm BST: DINEO SESHEE BOPAPE

Mwy o wybodaeth

Yr artist rhestr fer AM9 Dineo Seshee Bopape yn sgwrsio gyda Chyfarwyddwr Rhaglenni RAW Material Company, Senegal, Marie Hélène Pereira, un o feirniaid Artes Mundi 9 a Chyfarwyddwr The Showroom, Llundain, Elvira Dyangani Ose, a’r artistiaid Evan Ifekoya a Tina Pasotra.

Dydd Mercher 21 Ebrill, 7pm BST: BEATRIZ SANTIAGO MUÑOZ

Mwy o wybodaeth

Yr artist rhestr fer AM9 Beatriz Santiago Muñoz yn sgwrsio gyda’r anthropolegydd, y ffeminist, y bardd a’r artist perfformio a’r ymgyrchydd Gina Athena Ulysse, Francis McKee (Cyfarwyddwr CCA Glasgow); ac Yvonne Connikie (Artist a Sylfaenydd Gŵyl Ffilm Ddu Cymru).

Dydd Gwener 7 Mai, 7pm BST: CARRIE MAE WEEMS

Mwy o wybodaeth

Yr artist rhestr fer AM9 Carrie Mae Weems yn sgwrsio gyda’r artist Sonia Boyce, a fydd yn cynrychioli’r DU yn Biennale Fenis yn 2021, Thomas J Lax, Curadur y Cyfryngau a Pherfformiad yn MOMA Efrog Newydd, yr artist, yr awdur a’r curadur Umulkhayr Mohamed a Nicole Ready (Artist, Steilydd a Sylfaenydd DOCKS Magazine).

Dydd Mercher 19 Mai, 1pm BST: MEIRO KOIZUMI

Mwy o wybodaeth

Yr artist rhestr fer AM9 Meiro Koizumi yn sgwrsio gyda Chyfarwyddwr Artistig Canolfan Celfyddyd Gyfoes Factory, Dinas Ho Chi Minh, Fiet-nam, Zoe Butt, hanesydd, cymdeithasegydd cymharol, seicolegydd ac addysgwr Abu-Bakr Madden Al Shabazz ac Evie Manning (Cyd-gyfarwyddwr, Common Wealth Theatre yng Nghaerdydd a Bradford).

Dydd Mercher 26 Mai, 7pm BST: PRABHAKAR PACHPUTE

Mwy o wybodaeth

Yr artist rhestr fer AM9 Prabhakar Pachpute, y curadur a’r darlithydd, Zasha Colah, Llyfrgellydd Llyfrgell Glowyr De Cymru Siân Williams, a Dr Radhika Mohanram, awdur ac Athro Saesneg yn y Ganolfan Theori Beirniadol a Diwylliannol ym Mhrifysgol Caerdydd.