Ym mis Hydref 2023 bydd Artes Mundi yn lansio AM10, ein degfed wobr ac arddangosfa a gynhelir bob dwy flynedd i ddathlu ein 20fed pen-blwydd o gyflwyno celf gyfoes ryngwladol arloesol yng Nghymru. Bydd AM10 yn cael ei gynnal ar draws pedair dinas mewn pum lleoliad ac mae’n cynnwys gwaith saith artist. I ddarganfod mwy am yr artistiaid sydd ar restr fer AM10, cliciwch yma.

Mae AM10 yn gyfle unigryw i fyfyrwyr archwilio Celf Gyfoes. Rydym hefyd wedi creu dwy uned greadigol a thrawsgwricwlaidd a fydd yn gwneud cysylltiadau ar draws Meysydd Dysgu a Phrofiad ac fe’u cynlluniwyd mewn ymateb i bedwar diben y cwricwlwm newydd. Mae’r unedau’n manteisio ar dystiolaeth amrywiol, gan gynnwys arbenigedd ac ymholiadau’r artistiaid sydd ar restr fer AM10 ac maent wedi’u cyd-greu gydag arbenigwyr a chymunedau lleol. Bydd myfyrwyr yn cael eu cefnogi i archwilio:

• Hawliau dynol a chyfrifoldebau
• Cyfiawnder amgylcheddol

Mae’r unedau hyn wedi’u cynllunio ar gyfer Cyfnodau Allweddol 3, 4 a 5 ond gellir eu haddasu i’w defnyddio gyda Chyfnodau Allweddol eraill.

Fel rhan o ymweliad ysgol, byddwch yn derbyn:

• Pecyn gwybodaeth cyn yr ymweliad, sy’n cynnwys gwybodaeth am yr artist sy’n arddangos yr ydych chi’n mynd i’w weld neu ei gweld ynghyd â chynnwys ar-lein i chi ei rannu gyda’ch myfyrwyr a fydd yn helpu i gyflwyno’r pynciau y maen nhw’n mynd i’w harchwilio.
• Llawlyfr y gallwch ei ddefnyddio yn ystod eich ymweliad. Bydd hwn yn cynnwys cwestiynau posibl i’ch myfyrwyr eu trafod a’u harchwilio wrth edrych ar y gwaith.
• Pecyn gwybodaeth ar ôl yr ymweliad, sy’n cynnwys tasg greadigol fer y gellir ei chwblhau yn yr ystafell ddosbarth, ac sy’n seiliedig ar y gwaith yn yr arddangosfa. Bydd y pecyn gwybodaeth hwn hefyd yn cynnwys gwybodaeth ychwanegol i helpu’r myfyrwyr i wneud gwaith ymchwil pellach.